Так называлася літаратурна-музычная праграма, якую падрыхтавала Гомельская абласная пісьменніцкая арганізацыя для аматараў паэзіі і прозы на V фестывалі кнігі “#ЧЫТАЙГОМЕЛЬ”.
Творчы асветніцкі праект, які кожны год ажыццяўляе Гомельская абласная ўніверсальная бібліятэка пры падтрымцы Саюза пісьменнікаў Беларусі штогад прыцягвае ўвагу як шматлікіх прыхільнікаў мастацкага слова, так і гасцей горада над Сожам. Цікавым на творчыя падзеі, выставы, прэзентацыі, творчыя знаёмствы, квэсты і майстар-класы, букіністычныя і рамесныя кірмашы і многае іншае стаўся і пяты форум. Асаблівасцю сёлетняга свята сталі літаратурныя падворкі ўсіх без выключэння раённых бібліятэк Гомельшчыны, на якіх супрацоўнікі раённых бібліятэчных сетак данеслі гледачам легенды роднага краю. А яшчэ многім пашчасціла пабачыць прэм’ерны спектакль народнага тэатра “Грачы” па трагікамендыі Андрэя Макаёнка “Трыбунал” (бібліятэчны тэатр, дарэчы, адзіны ў Беларусі), падрыхтаваны да 95-годдзя абласной бібліятэкі. Таксама можна было судакрануцца і з цікавай, непаўторнай гісторыяй, кніжнай, фальклорнай культурай і традыцыямі нават Кітая, дзякуючы студэнтам і выкладчыкам дзяржуніверсітэта імя Ф.Скарыны ды пазнаёміцца з кніжнымі навінкамі беларускіх выдавецтваў.
Прыгожае свята выдатна аздобіла і амаль трохгадзінная літаратурна-музычная праграма “Свята добрых слоў”, якая была падрыхтавана абласной пісьменніцкай арганізацыяй: на галоўнай фестывальнай сцэне чыталіся вершы, гучалі песні, а таксама ўшаноўваліся пераможцы розных літаратурных конкурсаў.
Так, цёплыя словы былі адрасаваны добрушскай паэтэсе Людміле Яськовай: песня “Дабро” на яе аднайменны верш днямі адкрывала рэспубліканскі фестываль “Вытокі” у Жлобіне. 30 маладых і здольных аўтараў па выніках разгляду іх творчасці на абласных семінарах паэзіі і прозы атрымалі пасведчанні аб прыёме ў Абласное літаб’яднанне “Слова” пры Гомельскім абласным аддзяленні Саюза пісьменнікаў Беларусі. Спецыяльныя пасведчанні аб прыёме мясцовых літаб’яднанняў ў гэтае новае абласное творчае фарміраванне атрымалі краўнікі гомельскага літаб’ядннання “Пралеска”, добрушскага народнага клуба “Натхненне”, народнага тэатра “Грачы” Ева Дударга, Людміла Яськова і Сяргей Зянькоў. А празаік Уладзімір Міроненка, літаратуразнаўца Іван Афанасьеў, драматург, рэжысёр-пастаноўшчык Сяргей Зянькоў атрымалі на свяце білеты прафесійнай пісьменніцкай арганізацыі. Ушанаваны лаўрэаты і двух абласных конкурсаў для школьнікаў, іх настаўнікі. Пранікнёнымі былі выступленні лаўрэатаў Х абласной літаратурнай прэміі імя Кірылы Тураўскага Тамары Кручэнкі, Ніны Шкляравай, Уладзіміра Гаўрыловіча, Жанэты Сычовай. Шмат музычных падарункаў-прывітанняў, прысвечаных Беларусі, роднаму кутку, гучалі ад паэтак і выканаўцаў Наталлі Шэмет, Галіны Ласаевай, Віктара Задарожнага і іншых.
У час насычанай на падзеі цікавай і запамінальнай праграмы заслужаны дзеяч культуры Рэспублікі Беларусь, старшыня Гомельскага абласнога аддзялення ГА “Саюз пісьменнікаў Беларусі”- кіраўнік Абласнога літаб’яднаня “Слова” Уладзімір Гаўрыловіч павіншаваў калектыў абласной універсальнай бібліятэкі з 95-гадовым юбілеем, жыткавіцкай ЦБС са 100-годдзем, а таксама ўручыў дыпломы бібліятэкарам за шматгадовае ўзаемакарыснае супрацоўніцтва. Гэтаксама падзячныя дыпломы ўручаны за актыўны ўдзел у свяце кнігі РВУ “Выдавецкі дом “Звязда”, мінскім пісьменнікам Іне Фраловай і Сяргею Трахімёнку.
Па выніках правядзення фестывалю з нагоды 95-годдзя ўстановы і за выдатную арганізацыю свята кнігі і чытання заслужаны дзеяч культуры Беларусі, старшыня Гомельскага абласнога аддзялення ГА «Саюз пісьменнікаў Беларусі» уручыў Падзячны ліст калектыву абласной бібліятэкі.
Уладзімір МІКАЛАЕЎ.
На здымках: у час свята кнігі ў Гомелі.